Ýagşylykda ile özün tanydan —
Alkyş alyp, derejesi zor bolar;
Ýaman bolup, ýagşylygy unudan —
Öz yzzatyn gidir, itden har bolar.
Melul bolar myradyna ýetmedik,
Müýnli bolar hak emrini tutmadyk,
0z ryzkyna hiç kanagat etmedik, —
Gözün diker, kişi aşyna zar bolar.
Her kim ýamanlasa deňi-duşuny,
Özi müşgül eder asan işini,
Kim dargatsa akyl bile huşuny,
Eder işin bilmez, şermysar bolar.
Gaýraty kem bolar gahary azyň,
Depgini pes bolar matamda sazyň,
Öýüne barsaňyz bir biniýazyň, —
Ýüz tutsaň, gysylar, köňli dar bolar.
Hazana dönüpdir ömrüm ter güli,
Nazaryn per tutar ilden bergili,
Biykbal, ýazykly, ýaman görgüli, —
Uçraş gelse, bir ýamana ýar bolar.
Magtymguly, sözle herne bileniň,
Özüňe kemlik bil aýtman öleniň
Taraşlap şaglatgyn köňle geleniň,
Senden soňkulara ýadygär bolar,