Hoş günüňde hoşlaşyban gezmäge,
Baryşmaga, gelişmäge ýat ýagşy,
Gam günüňde, galmagalyň üstünde,
Dogan ýagşy, gardaş ýagşy, zat ýagşy.
Halal işle, ahyryýetden wehmiň bar,
Pakyry ynjytma, köňül rehmiň bar.
Aşyk aýdar, az-da-köp-de pähmiň bar,
Akyl bolsaň, söze gulak tut ýagşy.
Mollalar ahyret sözün söýlärler:
Müňkür olma, geljek işdir, eýlärler,
Kim biler ki ahyryýetde neýlärler, —
Iýip, içip, munüp, guçup öt ýagşy!
Nep almaýan kişi sözden, öwütden,
Aýralygy ýokdur gury söwütden,
Deň-duş bilmez, many aňmaz ýigitden,
Agylynda yssy beren it ýagşy.
Magtymguly, dostdan syryň gizleme,
Biwepadyr, nämähremi gözleme,
Ümsüm otur, halk içinde sözleme,
Sözlär bolsaň, söz aslyna ýet ýagşy.