Köňlüm istär, gezsem dünýä-älemi,
Ganatym ýok, uça bilmen, neýläýin!
Okyr men, görer men barça kelamy,
Manysyny saça bilmen, neýläýin!
Köpler anda guwwas bolup ýüzerler,
Maňa zahyr, halkdan pynhan gezerler,
Gül badada gülgün şerap ezerler,
El uzadyp, içe bilmen, neýläýin!
Ýitdi ýolum, dag kaýsydyr, düz kaýsy,
Aňmaz köňlüm, magny kaýsy, söz kaýsy,
Pähm eýlemez, ýol kaýsydyr, yz kaýsy,
Umyt üzüp, gaça bilmen neýläýin !
Magtymguly bu dünýäniň namysyn,
Ýygyp- düýrüp, ýele berdim hamysun,
Pekir derýasyna aklym gämisin,
Batyrmyşam, çyka bilmen, neýläýin !