Dag, dereler lerzan urar,
Owsun atyp, sil biläni.
Azaşanlar yşga ýortar,
Aýra düşüp, ýol biläni.
Namart içde syr saklamaz,
Akylsyz hiç söz beklemez,
Mert ýigit baryn ýoklamaz,
Her iş gelse il biläni.
Derýalary joşdurar sil,
Bir birewden aýyrar til,
Ganat kakyp saýran bilbil,
Meýlis eýlär gül biläni.
Guşdan gorkan ekmez dary,
Sünbüllerin böler peri,
Hüjüm eýlär barça ary,
Gabat gelse bal biläni.
Karun gezdi çoh mal alyp,
Hars urdy efsun çalyp,
Magtymguly, mejnun bolup,
Gitsem gerek çöl biläni.