Bir bidöwlet bile birge bolynçaň,
Döwletliniň gapysynda gul bolgul.
Bedasyl beg gullugynda ýörinçäň,
Asyl begiň saýasynda kül bolgul.
Ýamany goý, ýagşylara göz ildir,
Kelhemeç hem «öz oglanym gözel» diýr,
Gargyş gurduň zürýadyny azaldyr,
Goýun kibi çar tarapa il bolgul.
Süleýman sen mura bir gulak goýgul,
Sözüni diňlegil, jogabyn aýgyl,
Häkim bolsaň, halky gün kibi çoýgul,
Akarda suw ýa öserde ýel bolgul.
Ýaman nedir öz nebsini besleseň,
Akmaklykdyr özün ýagşy toslasaň,
Her bazarda rowaç bolmak islesen,
Ýagşylaryň kisesinde pul bolgul.
Magtymguly, bardyr demin hesibi,
Ir, giç ýeter her bendäniň nesibi.
Kişi bolsaň, goýgul gury täsibi ,
Ýagşy-ýamak barçalarga del bolgul.