GÖZE  MYHMANDYR

Gara daşdan gara gyly saýlan göz,

Çöňňeler görejiň, göze myhmandyr.

Gelen aş diýp gelmez, turşutmagyl  ýüz,

Nana  mähtäç däldir, söze myhmaldy.

Agyrdar heňňamlar, uzakdyr ýollar,

Soraşsa ýigitler, sözleşse tiller,

Baharda açylan reňbe-reň güller,

Bir pasyl açylar, ýaza myhmandyr.

Ne azym hünärler, ne syrly işler,

Ne howaly baglar, belent agaçlar,

Altmyş elwan, ýetmiş dürli iýmişler,

Agaçdan  aýrylar,  güýze  myhmandyr.

Ýigidiň bolmasa ýaragy, aty,

Şony belli biliň, ýokdur gaýraty!

Gojaldykça, gider süwdüň  kuwwaty,

Ýigitligiň zory dyza myhmandyr.

Haky ýada salsaň hakdan gorkyňa,

Şeýtan ara düşer, goýmaz erkiňe,

Guba  juwan,  guwanmagyl görküňe,

Gojalar sen, görküň ýüze myhmandyr

Magtymguly aýdar, iller, özüm-de,

Ölüm  ýadymdadyr,  gorky  gözümde,

Her niçe ýaşasaň ýeriň ýüzünde,

Adam ogly bäş gün duza myhmandyr.