Bag eýesi bagyn etmiş gadagan,
Şasenem gyz bag seýline geledir.
Bilbiller, gonuňlar gülden-güllere,
Meniň ýarym bag seýline geledir.
Nerkes, gözün, ýumup, gyýa bakmagyl,
Gözýaşym sabr eýle, sil dek akmagyl,
Nala, hijran çekip, bagrym ýakmagyl,
Meniň ýarym bag seýline geledir.
Toty, sen özüňi söze çaglama,
Senuber, sen boýuň egip aglama,
Sünbül, sen saçyňy tar-tar baglama,
Meniň ýarym bag seýline geledir.
Garyp aşyk bu gün bagbanlyk kylyp,
Aýralyk derdine bagryny tilip,
Aşygynyň ýetim bolganyn bilip,
Şasenem gyz bag seýline geledir.