Däli könlüm, gel !gideli watana,
Anda saňa gözi ýolda Talan bar;
Kasyt gerek bu ýollarda ýörmäne,
Näzli ýaryň ülkesinde talaň bar.
Gülüm-gülüm, meni eýlediň gülünji,
Ýüz agladym, bir şat olup gülinçe,
El götermen eteginde ölinçe,
Meger bizi ýardan aýra salan bar.
Ajalym ýetişip, peýmanam doldy,
Gül meňzim sargaryp bihuda soldy,
Diýdiler: «söwdügiň ýary ýat oldy»,
Diýdi belki ýedi ýatdan gelen bar.
Aşyk Hemra, girifgardyr özüne!
Köýdi bagrym, kebap boldy ýüzüne,
Ynanmanam ykraryna, sözüne,
Biykrar sen, ykrarynda ýalan bar.