Baglarynda elwan güller açylmyş,
Miwesi kemala gele, söwdügim;
Ak ýüzleriň ilahydan ýasalmyş,
Gül ýüzleriň hala-hala, söwdügim.
Boz maralym, aç garyçgaý bakyşlym,
Dal gerdene tylla heýkel dakyşlym,
Aşyklaryň şirin janyn ýakyşlym,
Boz tarlan sypatlym, güle söwdügim.
Ýarym bilen söhbet edip göreýdim,
Dalaşyp her zaman lebin soraýdym,
Çemen içre seýl edişip ýereýdim,
Seýran etseň biziň bile, söwdügim.
Başymga düşüpdir ýüz gaýgy, älem,
Hak.aşyk men, seniň köýünde ölem,
Sen bir gül pudagy, men bir bilbilem,
Uçup-uçup gonsam, güle, söwdügim,
Egniňe ýaraşar gyrmyzy, ala,
Lebiňe ýaraşar altyn pyýala,
Hemra diýer, dostum, gitme hyýala,
Gel myradyň bizden dile, söwdügim.