Eý agalar, näzli ýaryn öýünde,
Isteseňiz genji-pynhan tapylar.
Köp aşyklar gezer munuň köýünde,
Sürer bolsaň, ýene döwran tapylar.
O zülpe baglyýam owaldan-başdaw,
Ölsemem aýrylman bu galam-gaşdan,
Çar tarapdan geler ondan, on bäşden,
Otagynda eziz myhman tapylar.
Sözlände sözünden dürlerin saçar,
Aşyk bolan şirin janyndan geçer,
ÝArym hümmet eýläp, sandygyn açar,
Bukjasyndan dürli elwan tapylar.
Iigitlermiz bardyr gollary bazly,
Bagşylarmyz bardyr bilbil owazly,
Ýurtlarymyz bardyr baharly-ýazly,
Saýyly diýr, çeşmi-girýan tapylar.