Bilbil horram bolup niçik saýrasyn,
Bagyn hazan ursa, gülden ne peýda, ,
Bir goç ýigit gamgyn bolman neýlesiň
Pelek sütem etse, ilden ne peýda.
Altmyşynda awuň alabilmer sen,
Ýetmişiňde dogry galabilmer sen,
Segsende märekä barabilmer sen,
Ýigrimi bäş ýaşdaky bilden ne peýda.
Adam bolar adamzadyň geregi,
Ogul bolar goç ýigidiň diregi,
Arap atyň köp gerekdir süýregi,
Guýrugy bolmasa, ýaldan ne peýda.
Her kimirse birlen bir ýana gitseň,
Ýadyndan çykarmaz ýagşylyk etseň,
Aýdyjy Babanýaz, dünýäden ötseň,
Garagöz gelinden, maldan ne peýda.