Gara gözli, galam gaşly perizat,
Aýda bilmen birje sözüm bar, saňa,
Hijriňde köýüp men dat bilen bidat,
Iki çeşmim bir görmäge zar, saňa.
Çil-çil bolan gara zülpüň baglama,
Hanjar alyp ýürek-bagrym daglama,
Esiriň men işigiňden kowlama,
Gerek dälmi namys bilen ar, saňa.
Dal gerdene tylla heýkel dakmasaň,
Nerkes gözüň süzüp, gaşyň kakmasaň,
Ýüz-müň suhan aýtsam bäri bakmasaň,
Niçik edip ýaranar men ýar, saňa.
Pidaýy diýr, isläp geldim men wepa,
Wepa isläp geldim, sen berdiň jepa,
Hijriňde hassa men, sen bergil şypa,
Şypa isläp geldim men bimar, saňa.