Daglar, diýsem waspyň durup,
Bir watan tutdugym, daglar.
Saýasynda çadyr gurup,
Kän meýlis etdigim, daglar.
Şerap suwuň içdim sorup,
Aw awladym kemer syryp,
Baglarynyň gülün tirip,
Miwesin datdygym, daglar.
Gara Balkan dagy diýrler,
Gaýaňda gaplanly şirler,
Üstüňde awçy mergenler,
Çagyrsa etdigim, daglar.
Söhbet etdim sazlar bilen,
Gyşyň geçer ýazlar bilen,
Ter-nowçaly gyzlar bilen,
Oýnaşyp utdugym daglar.
Baýram nätsin, ýanyp bişse,
Bagymdan bilbilim uçsa,
Nesibämiz aýra düşse,
Hemaýat etdigim daglar.