Owalda aklymy haýran eýlediň,
Hylwat ýerde sözleşeýli, söwdügim,
Agladyp, göz ýaşy girýan eýlediň,
Uzak döwran yzlaşaýly, söwdügim.
Bagda bilbil saýrar, çekdigi zardyr,
Aşyga köýmeklik owaldan bardyr,
Gerdeniň dutardyr, zülpleriň tardyr,
Saba turup, sazlaşaýly, söwdügim.
Ýetim guzy deýin gezmegin mäläp,
Gözeller içinde men seni halap
Ömrümi ötürdim, näzli ýar, aglap,
Gelse bahar, ýazlaşaýly, söwdügim.
Şeýdaýy diýr, gitmez synamyň dagy,
Göwsüňde guralmyş Eremiň bagy,
Ol ala gözleriň ýagydyr-ýagy,
Ogryn-ogryn sözleşeýli, söwdügim.