MAGRUPLYKDA BELLIDIR
Dostlar dört gözeliň, waspyn sözlesem,.
Dördüsi-de magruplykda bellidir;
Bezenipdir bir-birine täsipkeş,
Asly söýünhanly, agyr illidir.
Birinin egniniň ýaşyl-aly bar,
Biriniň biliniň tirme şaly bar,
Birisiniň ak ýüzüniň haly bar,
Biri bagrym kesen, şirin tillidir.
Biri meňzär kölüň guba gazyna,
Biri meňzär pasly-bahar ýazyna,
Biri ogşar Saýathanyň özüne,
Biri pisse dahan lebi ballydyr.
Biri bardyr bagda bile gezmäge,
Biri bardyr suwda bile ýüzmäge,
Biriniň şanyna dessan düzmäge,
Biri mürçe-miýan, inçe billidir.
Dört gözel görmüşem, elheder,aman,
Kirpikleri okdur, gaşlary keman,
Ikisi ter gelin, biri nowjuwan,
Şabende diýr, birniň seri tellidir.