ESERLI

Bibi jan! Bag içre bir oglan gördüm,

Näzenin ýigitdir, ýüz elwan dürli!

Ony görüp,  akyl-huşum ýitirdim,

Ýetişgeç jilwesi, boldum eserli.

Ne sebäpdep gülgün meňzim sarala,

Bagrym başy köz-köz bolup garala?

Asly ynsan, ogşatmyşam marala,

Ýetişdi jilwesi — boldum eserli.

Halka-halka  käkilleri  zerewşan,

Bahar eli degip bolmuş perişan,

Adamzat şahy diýp eýledim güman,

Ýa bolmasa Hemra jandan habarly.

Selip diýer, aklym haýran eýledim,

Görenimi saňa beýan eýledim,

Seniň Hemraň diýip, güman eýledim,

Ýaňaklary hal-hal, ýüzleri zerli.