Tahyryň seýir etmiş pany jahany
Sen dek gözel hiç görmedim illerde,
Köňlümiň aramy, menzil-mekany,
Bilbiliňsaýramaz özge güllerde.
Il husnuňa dahyl, görmäge zar men,
Yşkyňda biçäre, köýüňde bar men,
Tä «ölünçäm, seniň ýoluň garar men,
Röwşen kimin gözüm galdy ýollarda.
Hanjarym janymda, oklaryň tende,
Gamzaň oky öldür, kast eder günde,
Suratyň göremde, hyýalyň mende,
Ýüzüň ýüregimde, sözüň dillerde.
Säher seýle çyksa, ger degse eller,
Ogşaşar her ýana, getirse tiller,
Zerefşan gulpaklar, syýa käkiller,
Çözseň — ýere düşer, erseň — billerde!
Arzuw eýläp, ýete bilmen jaýyňa,
Janym pida bolsun häki-paýyňa,
Yrakdan guwanar husny-roýuňa,
Tahyr sowal etmiş zebun hallarda.