Eýran, Turan, arap, ajam ilinde,
Görmedim seniň deý owadan gelin.
Jahan ragnasynda, bagyň gülünde,
Bolmaz özüň kimin gül beden, gelin.
Gözleseň jan alar gara gözleriň,
Ölini direlder şirin sözleriň,
Alma ýanaklaryň, güler ýüzleriň,
Şirindir leblerň miweden, gelin!
Gara üzüm sen, şerbet bilen ýutmaga,
Takat bermez, köňül üzüp gitmäge,
Duzak gurup, aşyklary tutmaga,
Zülpün başdan-aýak tor eden gelin.
Kamatyn tubudyr, goýnuňda nardyr,
Gerdeniň dutardyr, zülpleriň tardyr,
Jemalyň görmäge gözlerim zardyr,
Görsem gül ýüzüňi, sabadan, gelin!
Nepes diýer, aşnalygym ýat olmaz,
Bir görmesem, hergiz köňlüm şat olmaz,
Ýer ýüzünde sen deý perizat olmaz,
Meger ýere düşdün howadan, gelin!