Wysalyňdan gamgyn köňlüm açyldy,
Pyrkatyňdan elip kaddym ýaý imdi.
Ýüzüň nury älem ara saçyldy,
Hergiz dogmaz özüň kimin aý imdi.
Säher ýeli zülpüň perişan eder,
Gamzaň okdur, jiger bagrym gan eder,
Görse bizi şum rakyplar taň eder,
Gyz, eýlegin öz goýnuňda jaý imdi.
Senden özge ýary gözüm görmesin,
Sensiz zowky alla maňa bermesin,
Sen bolmasaň, dünýä bir dem durmasyn,
Ýykym-ýumrum bolsa, diýmen «waý» imdi.
Nepes diýr, bir ýara bilim baglar men,
Aryf özüm, dost-duşmany saglar men,
Tä ölinçäm, Durdy han diýp aglar men,
Gözlerimden dolup aksyn çaý imdi.