Ýaňaklary läläm, pisse dahanym,
Men döner men, köňlüm dönmiez, ýar, senden!
Roýy gül-benewşäm, toty suhanym,
Men döner men, köňlüm dönmez, ýar, senden.
Perhat «Şirin» diýip, munça gezendir,
Mejnun, Leýli sütemine dözendir,
Diýmegil: «Ýar menden eliň üzendir»,
Men döner men, köňlüm dönmez, ýar senden.
Bu ýalan jahanda sen-sen daýanjym,
Göwherim, hazynam, magdanym, genjim,
Maksadym, myradym, köňül güýmenjim,
Men döner men, köňlüm dönmez, ýar, senden.
Zelili diýr, meniň Döndi hanym sen,
Jesedim içinde şirin janym sen,
Gyýmazym, dözmezim, mähribanym sen,
Men döner men, köňlüm denmez, ýar, senden.