KÖŞK ŞAHYRLARY

Şahyrlary ýigrenipdir patşalar.

Olary söýüpdir emma halaýyk.

Hak şahyrlar mydam hakyñ yşgynda,

Şoñ üçin gyljyndan gan daman şalar,

Şoñ üçin iñ güýçli duşmany saýyp,

Şahyrlary saklaýar öz köşgünde.

Emma Magtymguly köşge girmändir.

Köşk ýüzüne tüýküripdir Nesimi.

Fuzulynyñ näm edeni belli däl,

Ýat illere çekipdir oñ nesibi.

Gören hanlaryndan göwni suw içmän,

Azady ýazypdyr ”Wagzy-Azady”.

Şindi-şindem gorkýarlar ol kitapdan,

Diýmek, ýerne düşüpdir oñ azaby...

Adamlar beletdir bu gadym däbe,

Hak şahyr şygryny çatmada düzer.

Suwsasa, barar ol ýabyñ boýuna,

Meýhanasy bolar çolaja güzer.

Patşa gulluk etseñ, meý guýar gaba.

Serpaýyñ ýetir ol her şamu-säher.

Ýöne suwa görä, mydam şeraba

Ýygy gatylýandyr awydyr zäher...