GUMLY GYZA Seniñ dokan halyñ nusga galypdyr! Seniñ çeken keşdäñ nusga galypdyr! Türkmeniñ ýyldyzly gijelerine Seniñ gözleriñden gussa galypdyr. Dak üstüñe ýene şaý-sepleriñi, Keteniñi çägä çyrpyp geý ýene. Kömelekli sähralaryñ eýesi, Sallanjyrap, Seýkin basyp, gel ýene! Gara basan ýaly galypdyr yzda Seniñ pajygaly, Galagop döwrüñ. Ýöne seniñ keşde çeken barmaklañ Ne beýle inçeden edipdir öwrüm? Ýa Aýyñ yşgyna düşüp gezipsiñ, Ýa Aý aýagyna başyn goýan gyz… Özi siñip rowaýatdyr ertekä, On barmagnyñ hünärini goýan gyz! Dak üstüñe ýene şaý-sepleriñi, Keteniñi çägä çyrpyp geý ýene. Kömelekli sähralaryñ eýesi, Sallanjyrap, Seýkin basyp, gel ýene! |