ALTYNDEPE

Başlanýan ýeri ýok,

ýok gutarýan ýeri-de!

Giden düzlük hanjak gözüñ aýlasañ.

Ine, saña keýik awlanan meýdan,

Ine, meýdan arkasynda ýaýnalan!

Bu düzleriñ derýalary sowlupdyr,

Bu düzleriñ jeññelleri gurapdyr.

Ýogsam, adamzadyñ başlangyjyny

Bu düzlükler sallançak dek üwräpdir!

Elladada deñziñ boýuna baryp,

Tolkunlary diñläp ertiru-agşam,

Kör Gomer olaryñ güwwüldisinden

Ilkinji setirni agtarýan wagtam

Bu giden sähralañ gelin-gyzlary

Ýanlyk ýaýyp,

            pişek urup,

                        ýag alyp,

Hemem läle kakyp arkama-arka,

Gezipdirler garşy alyp ýazlary.

Şaññyrdaşyp,geýip alu-ýaşyly,

Aýa garşy dogup aýdyñ gijeler,

Sebsedip yzynda köýen aşygny,

Gürlär eken ahyr syrly dideler.

Bu düzlerde toý tutupdyr adamlar,

Gazanlar lasyrdap, tagam bişipdir.

Aksakgallar edil Hudaýlar kimin,

Öñünden geljegiñ donun biçipdir.

...Soñra döwran gaýdyp, geçmiş dönüpdir,

Dymypdyr düzlerde kerwenleñ jañy,

Ýatypdyr gelinleñ kümşüniñ ýañy.

Aksakgallañ maslahaty çaşypdyr,

Bagtly illeñ bagty Gün deý ýaşypdyr.

Deñziñ kenarynda

Galýan balykgulaklary ýatladyp,

Ýaşaýşyñ yzyna gaýdan ýerinde

Şagrap ýatyr küýze döwükler indi.